زوج في محكمة الأسرة.. جابتلي اخواتها ضربوني وسرقوا الشقة

"اتكاتروا عليا وأنا كنت لوحدي في البيت ضربوني جامد وسرقوا كل فلوسي اللي كانت في الشقة بعد ما أختهم اللي هي مراتي قالتلهم على مكانها وسابوني سايح في دمي" بدأ الزوج صاحب الـ 34 عام حديثه أمام محكمة الأسرة بإمبابه حديثة في دعواه التي رفعها ضد زوجته بعد أن تشاجر معها وتركت له المنزل وأخذت أطفالها الثلاثة وذهبت إلى منزل أبيها. 

وأكمل الزوج حديثة أمام المحكمة قائلًا.. "بدأت المشاكل ما بينا بعد ما أمها وأخواتها البنات اتدخلوا في حياتنا هي عندها أختين وتلات أخوات رجالة كل حاجة كانت بتحكيها لأخواتها وأمها طبعًا بدأت تدخلاتهم في حياتنا تزيد وأنا مش حابب الحاجة دي لغاية ما في مرة قولتلها بلاش تطلعي أسرارنا برة علشان بيتنا ميتخربش طبعًا اتجننت علشان قولتلها أمك واخواتك هيخربوا بيتنا وغلطت في وتطورت المشادة إلى مشاجرة تعدى كل منا على الآخر".

"أخدت ولادي الـ3 وذهبت إلى بيت أبوها ومفيش ساعتين لقيت اخواتها التلاتة الرجالة فوق دماغي في شقتي اتكاتروا عليا وضربوني حاولت أدافع عن نفسي بس الكترة تغلب الشجاعة وبعد ما ضربوني سرقوا فلوسي كلها وعملت محضر تعدي بالضرب وتقرير طبي بعد أن مكثت في المستشفى أيام وإلى الآن زوجتي لم تعود إلى المنزل وبيتي اتخرب واللي كان كان"، بهذه الكلمات انهى الزوج حديثة للمحكمة في الدعوى التي رفعها ضد زوجته.